Måleri / relieff

Mona Orstad Hansen sitt kunstnarlege virke er dedikert til eit abstrakt formspråk. Kunstnaren arbeidar med måleri, ofte i saman med enkle skulpturelle objekt og relieff. Ho er grunnleggjande oppteken av form, noko som speglar seg i at måleria ofte berre består av éin til to fargar. Ho tek med seg erfaringane frå måleriet og forsøkjer å overføra denne kunnskapa til arbeidet med tre.

Mona Orstad Hansen (f. 1976) bur og arbeider i Stavanger. Ho har utdanning frå Kunstakademiet i Trondheim (5. årsstudent) og tok ein bachelorgrad med First Class Honours ved Gray’s School of Art ved Robert Gordon University i Aberdeen, Skottland. Ho har hatt ei rekkje separatutstillingar, mellom anna ved Kunstnerforbundet (2025), Trondheims Kunstforening (2021), Sandnes Kunstforening (2019) og Galleri LNM (2018).

Av gruppeutstillingar kan ein nemne Håndplukket 2 ved KB Contemporary, Oslo (2025), Plattform – Farge ved Arkivet Tou Trykk, Stavanger (2023), The Unseen med verk frå Christen Sveaas’ kunststifting ved White Chapel Gallery, London (2022), samt fleire deltakingar på Høstutstillingen, Oslo (seinast i 2020). Kunstnaren har òg laga fleire kunstprosjekt i offentleg rom, mellom anna veggrelieffet Forestillinger (2023) til Kongsberg vidaregåande skule for Buskerud Fylkeskommunes kunstsamling.

Arbeida hennar er innkjøpte av mellom anna KORO til Nye Stavanger Universitetssjukehus, Stavanger Kunstmuseum, Christen Sveaas’ kunstsamling, Høgskulen i Bergen og Norges Bank. I 2024 fekk ho tildelt eit treårig arbeidsstipend frå Statens kunstnarstipend.

Utstillinga på Hå gamle Prestegard er støtta av Billedkunstnernes Vederlagsfond og Stavanger kommune