Installasjon
Anna Kristin Ferking arbeider med materialitet, farge og form. Hennar tilnærming til det skapande arbeidet er prosessbasert. Ferking har i utgangspunktet ein grunnleggjande idé, ofte med rot i motstand og friksjon; noko som genererer energi og kjem til uttrykk i den kreative praksisen. Ettersom prosjektet foldar seg ut, kan det ta nye retningar. På den måten er nærværet viktig, og observasjonar undervegs blir identifiserte og gjer seg gjeldande. I utstillinga FALDA UT på Hå gamle prestegard, er kontrastar stikkord, og i nyansar av lys og mørke er tekstil ein tonegjevande aktør.
Anna Kristin Ferking har Master i kunst, Kunstakademiet, Universitetet i Bergen(KMD). Ho har bakgrunn i det grafiske feltet, men under studietida gjekk ho nye vegar i kunstnarskapet sitt, og arbeider i dag innanfor området installasjon. Ferking har medlemskap i Tegnerforbundet(TF), Norske Grafikere(NG) og Landsforeningen Norske Malere(LNM). Av separatutstillingar kan nemnast: Sandnes kunstforening, Bømlo kunstlag, Vandreutstilling i Ryfylke kunstlag. Ho har ellers delteke på bl.a. kollektive utstillingar som: Nudge it-Kick it-Prod it-Push it, (Avgangsutstilling Master), Bergen Kunsthall, MFA1, Bergen Kjøtt, «Trykk i tida», Hit-utstillinga, Haugesund billedgalleri, Åpningsutstillingen Dronning Sonja KunstStall og Vestlandsutstillingen.
Utstillinga på Hå gamle prestegard er støtta av Billedkunstnernes Hjelpefond og Stavanger kommune